ހަތަރު ލައްކައެއްހާ ޑޮލަރު، ޖޯޑުތަކަކަށް އަޅައިގެން އުޅެނިކޮށް ހިފަހައްޓައިފި

490،000 އެމެރިކާ ޑޮލަރު، މައިކްރޯވޭވަކާއި ގިނަ އަދަދެއްގެ ޖޯޑުތަކަކަށް އަޅައިގެން އުޅުނު މީހަކު ހައްޔަރުކޮށްފިއެވެ. މި މީހުން ހައްޔަރުކޮށްފައިވަނީ އިންޑިޔާގެ ޑައިރެކްޓްރޭޓް އޮފް ރެވެނިއު އިންޓެލިޖެންސް އިން ހިންގި އޮޕަރޭޝަންތަކެއްގައި އިންދިރާ ގާންދީ އިންޓަނޭޝަނަލް އެއަރޕޯޓުންނެވެ.

“ހިންދުސްތާން ޓައިމްސް” އިން ބުނެފައިވާ ގޮތުގައި މި މައްސަލައިގައި ހައްޔަރުކޮށްފައިވަނީ އަފްޣާނިސްތާނުގެ މީހެކެވެ. އަދި އެމީހާ މި މައިކްރޯވޭވް އާއި ޖޯޑުތަކަށް ގެންގުޅުނީ ދާގީނާ (ލަގޭޖް) ގެ ގޮތުގައިކަމަށްވެސް ބުނެފައިވެއެވެ.

މީގެއިތުރުންވެސް، އިންޑިޔާގެ ނޫސްތަކުން ބުނެފައިވާ ގޮތުގައި މި މީހާވަނީ މި ތަކެތީގެ އިތުރުން ގެންގުޅުނު ދަބަހުގައިވެސް ގިނަ އަދަދެއްގެ ފައިސާ ރައްކާކޮށްފައެވެ.

މި މީހާ މައިކްރޯވޭވްގެ ތެރެއަށް ގިނަ އަދަދެއްގެ ފައިސާ އަޅާ، ސްކޭން މެޝިނުތަކުން ނޭނގޭނެ ގޮތް ވަނީ ހަދާފައެވެ. އެގޮތުން، މައިކްރޯވޭވްގެ ބައިތައް ރޫޅާލުމަށްފަހު ފައިސާތައް އެޅުމަށްފަހު، ފަހުން ރޭވިއިރުވަނީ ކަޅު ކުޅައިގެ ޓޭޕު އަޅާ ވަރަށް ރަނގަޅަށް ބަންދުކޮށްފައެވެ.

ނޫސްތަކުން އިތުރަށް ބުނެފައިވާ ގޮތުގައި މިއީ ވަގަށް އެތެރެ ކޮށްފައިވާ ރަންތަކެއް ވިއްކައިގެން މި މީހާ ހޯދާފައިވާ ފައިސާތަކެކެވެ. އަދި، އޭރު އޭގެތެރެއިން ބައެއް ރަންތައް ކަމާ ބެހޭ ފަރާތްތަކުން ހިފަހައްޓާފައިވާކަށްވެސް މައުލޫމާތު ލިބެއެވެ.

މި މައްސަލައިގައި އިތުރު މީހަކު ހައްޔަރުކޮށްފައިވެއެވެ. އެހެންނަމަވެސް، އެއީ އިންޑިޔާގެ ރައްޔިތެއްކަމެއް ނުވަތަ އެހެން ޤައުމެއްގެ ރައްޔިތެއްކަމެއް ހާމަކޮށްފައި ނުވެއެވެ.

އިންޑިޔާގެ ކަމާ ބެހޭ ފަރާތްތަކުން ބުނާ ގޮތުގައި މި އަހަރުގެ މިހާތަނަށް މިފަދަ މައްސަލަތަކުގައި 219، އެހެން ޤައުމުތަކުގެ މީހުން ހައްޔަރުކޮށްފައިވެއެވެ.