ދިވެހި ޕޯސްޓް (ޑީޕީ) ގެ ސޯޝަލް މީޑިއާ ގުރޫޕަށް ޖޮއިން ވުމަށް ކުލިކު ކޮއްލައްވާ
ކައިވެނި ކުރަން އުޅޭ ކަމަށް ދެއްކި ވާހަކަ ޕަރިނީތި ޗޯޕްރާ ދޮގުކޮށްފިއެވެ.
މިމަހު ފުރަތަމަ ދުވަހު ޕްރިޔަންކާ ޗޯޕްރާ އާއި ނިކް ޖޯނަސް ކައިވެނިކޮށްފައިވާއިރު އެކައިވެންޏަށްފަހު ޕަރިނީތި ވެސް އޭނާގެ ލޯބިވެރިޔާ ކަމަށް ބުނާ ޗަރިތް ދިސާއީ އާ ވަރަށް އަވަހަށް ކައިވެނި ކުރާނެ ކަމަށް ވާހަކަ ވަނީ ފެތުރިފައެވެ. ނަމަވެސް ޕަރިނީތި ވަނީ އެހަބަރުތަކަށް މިހާރު ރައްދެއް ދީފައެވެ.
ޓުވިޓާ މެދުވެރިކޮށް ޕަރިނީތީ ބުނީ އެއީ ހަގީގަތް ނެތް ވާހަކަތަކެއް ކަމަށެވެ. އަދި ކައިވެނިކުރަން އުޅޭނަމަ އުފާވެރި ކަމާއެކު އެހަބަރު ހާމަކުރާނެ ކަމަށްވެސް ޕަރިނީތި ވަނީ ބުނެފައެވެ.
ޕަރިނީތި އެންމެ ފަހުން ފެނިފައިވަނީ ނަމަސްތޭ އިންގްލެންޑުންނެވެ. ފިލްމަށް ހާބޮޑު ކާމިޔާބެއް ލިބިފައިނުވާއިރު އެފިލްމުގައި ޕަރިނީތި އާއެކު ފެނިގެންދިޔައީ އަރްޖުން ކަޕޫރެވެ. ޕަރިނީތި ދެން ފެނިގެންދާނީ ޖަބަރިޔާ ޖޯޑީ އިންނެވެ. އަންނަ އަހަރުގެ މެއި މަހުގެ 17ގައި އެފިލްމު ނެރުމަށް ހަމަޖެހިފައިވާއިރު އެފިލްމުގައި ޕަރިނީތި އާއކު ފެނިގެންދާނީ ސިދާތު މަލްހޯތުރާއެވެ.
Facebook Comments