ކުއްލިއަކަށް އަދީބު ޖަލަށް ގެންދިއުމުން ސުވާލު އުފެދޭ – ފުއާދު

އެހެން ސިޔާސީ ލީޑަރުންނަށް ކުރެވުނު ޝަރީއަތްތައް މުރާޖަޢާ ކުރެވުނު ފަދައިން، ކުރީގެ ނައިބު ރައީސް އަޙުމަދު އަދީބު އަބްދުލް ގަފޫރުގެ މައްޗަށް ކުރެވުނު ޝަރީއަތްވެސް މުރާޖަޢާ ކުރަން ޖެހޭކަމަށް އިލެކްޝަންސް ކޮމިޝަންގެ ކުރީގެ ރައީސް ފުއާދު ތައުފީގު ވިދާޅުވެއްޖެއެވެ.

ޓްވިޓަރ މެދުވެރިކުރައްވާ ފުއާދު ވިދާޅުވީ ކުއްލި ގޮތަކަށް އަދީބު ޖަލަށް ގެންދިއުމުން، އެކަމާމެދު ސުވާލު އުފެދޭކަމަށެވެ.

“އެހެން ލީޑަރުންގެ މައްސަލަތައް މުރާޖައާ ކުރެވުނު ފަދައިން އަޙުމަދު އަދީބުގެ ޝަރީއަތްތައްވެސް މުރާޖަޢާ ކުރެވެން ވާނެކަމަށް ދެކެން. ކުއްލި ގޮތަކަށް އޮނަރަބަލް އަދީބު ޖަލަށް ގެންދިއުމުން ސަުވާލު އުފެދޭ.” ފުއާދު ވިދާޅުވިއެވެ.

މީގެއިތުރުންވެސް، އީސީގެ ކުރީގެ ރައީސް ވިދާޅުވީ އެންމެންނަށްވެސް އިންސާފު ހޯދައިދިނުމަކީ ސަރުކާރު އޮތުމުގެ ބޭނުންކަމަށެވެ.

ފުއާދު މިހެން ވިދާޅުވިއިރު، ގިނަ އަހަރުތަކަކަށް ޖަލަށް ލުމަށް ޙުކުމް ކޮށްފައި ހުރި އަދީބު، ގޭބަންދަށް ބަދަލުކޮށްފައި ހުއްޓާ މި ހަފްތާ ތެރޭގައި ވަނީ އަލުން ޖަލު ބަންދަށް ބަދަލު ކޮށްފައެވެ. މިކަމާ ގުޅިގެން އަދީބުގެ އަނބިކަނބަލުން ނަޝްވާ ވިދާޅުވެފައިވަނީ އެކަން ކޮށްފައިވަނީ ޑޮކްޓަރުގެ ލަފަޔާ ޚިލާފަށްކަމަށެވެ.

ހަމައެހެންމެ، އަދީބު ރައީސްކަން ކުރައްވާ އެމްޓީޑީ އިންވެސް ވަނީ އެކަން ކުށްވެރި ކޮށްފައެވެ