ދިވެހި ޕޯސްޓް (ޑީޕީ) ގެ ސޯޝަލް މީޑިއާ ގުރޫޕަށް ޖޮއިން ވުމަށް ކުލިކު ކޮއްލައްވާ
ވެރިކަންކުރާ ކޯލިޝަން ރޫޅުނަ ނުދީ ހިފެހެއްޓުމަށް ކުރެވެންހުރި މަސައްކަތްތައް ކުރައްވާނެ ކަމަށާއި ރައީސް އިބްރާހިމް މުހައްމަދު ޞާލިޙްއާއިއެކު ދެމިހުންނަވާނެކަމަށް ކުރީގެ ރައީސް މައުމޫން އަބްދުލްޤައްޔޫން ވިދާޅުވެއްޖެއެވެ.
މައުމޫން މިހެން ވިދާޅުވެފައި ވަނީ ކޯލިޝަން އެއްބަސްވުމަށް އިހްތިރާމް ކުރުމެއް ނެތި ރައްޔިތުން މަޖިލިސް އިންތިޚާބުގައި ހުރިހާ ދާއިރާއަކަށް ވާދަކުރަން އެމްޑީޕީ އިން ނިންމުމުން ކޯލިޝަން ރޫޅިދާނެ ކަމުގެ ބިރު ބޮޑުވެފައި ވަނިކޮށެވެ.
ކޯލިޝަންގައި އެއްވެސް މައްސަލައެއް ނެތް ކަމަށް ވިދާޅުވެ ރައީސް ޞާލިހް މިއަދު ވާހަކަފުޅު ދައްކަވާފައި ވަނިކޮށް މައުމޫން މިރޭ ކުރެއްވި ޓްވީޓެއްގައި ވިދާޅުވީ ކޯލިޝަންގެ އެއް ބައިވެރިއެއްގެ ހައިސިއްޔަތުން އެމްއާރްއެމް އިން ކޯލިޝަން ދަމަހައްޓަން ބުރަކޮށް މަސައްކަތް ކުރާނަން ކަމަށެވެ.
“ރާއްޖޭގައި ޤާނޫނު ތަންފީޒުކޮށް ހެޔޮވެރިކަމެއް ކުރުމަށް ރައީސް ޞާލިހަށް އެއްބާރުލުން ދޭނަން.” މައުމޫން ވިދާޅުވިއެވެ.
ކޯލިޝަން ދަމަހައްޓާ ރައީސް ޞާލިހާއި އެކު ހުންނާނަން ކަމަށް މައުމޫން ވިދާޅުވިއިރު ކޯލިޝަންގެ އެއްބަސްވުމާއި އެއްގޮތައް މަޖިލިސް އިންތިޚާބުގައި ވާދަކުރެއްވުމަކީ އެންމެ ރަނގަޅު ގޮތް ކަމަށް ރައީސް ޞާލިހް މިއަދު ވެސް ވިދާޅުވިއެވެ. ނަމަވެސް ކޯލިޝަން އެއްބަސްވުމާއި އެއްގޮތައް މަޖިލިސް އިންތިޚާބުގައި އެމްޑީޕީ އިން ވާދަކުރަން އެމްޑީޕީ ގައުމީ މަޖިލީހުގެ ތާއިދު ހޯދަން ރައީސް ޞާލިހް މަސައްކަތް ކުރައްވާފައެއް ނުވެއެވެ.
އަންނަ އޭޕްރިލް މަހު އޮންނަ މަޖިލިސް އިންތިޚާބުގައި ކޯލިޝަންގެ ބައިވެރިން ގުޅިގެން އިންތިޚާބަށް ނިކުތުން އެއީ ވާނެކަމެއް ނޫންކަން މިހާރު ގާތްގަނޑަކަށް ޔަގީނެވެ. އެއީ އެމްޑީޕީ އިން 86 ދާއިރާއަށް ވާދަކުރާ ކެންޑިޑޭޓުން މިހާރު ކަނޑައަޅާފައި ވާތީއެވެ.
Facebook Comments