އެމްޑީޕީ ޕްރައިމަރީގެ ވޯޓުލުމުގެ ވަގުތު އިތުރުކޮށްފި

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީގެ ވޯޓުލުމުގެ ވަގުތު އިތުރުކޮށްފިއެވެ.

ކުރިން ހަމަޖެހިފައި އޮތީ ވޯޓުލުމުގެ ކަންކަން މިރޭ 8:30 އާއި ހަމައަށް ކުރިއަށްގެންދާ ގޮތަށެވެ. ނަމަވެސް އެ ވަގުތު މިރޭ 9:30 އަށް އެމްޑީޕީން ވަނީ އިތުރުކޮށްފައެވެ. ނަމަވެސް ކިޔޫގައި މީހުން ނެތް ދާއިރާތަކުގައި ވޯޓުލުން 8:30 ގައި ބަންދުކުރާނެ ކަމަށް އެމްޑީޕީން ބުންޏެވެ.

ފ.ނިލަންދޫ ދާއިރާ އަށް އެއްވެސް ފަރާތަކުން ކުރިމަތިލާފައި ނުވާއިރު އެންމެ ގިނަ އަދަދަކަށް މީހުން ކުރިމަތިލީ ވިލިމާލެ ދާއިރާ އަށް ކަމަށްވެސް އެމްޑީޕީން ބުނެއެވެ. އެގޮތުން އެ ދާއިރާގެ ޕްރައިމަރީގައި 9 މީހަކު ވާދަކުރެއެވެ.

މީގެއިތުރުން އެންމެ މީހަކު ކުރިމަތިލުމުގެ ސަބަބުން 9 ދާއިރާއެއްގެ ޓިކެޓު މިހާރު ކަށަވަރުވެފައިވާ ކަމަށްވެސް އެމްޑީޕީން މައުލޫމާތުދެއެވެ. އެ ދާއިރާ ތަކަކީ ދިއްދޫ ދާއިރާ، ހޯރަފުށީ ދާއިރާ، ބާރަށު ދާއިރާ، މިލަންދޫ ދާއިރާ، އަލިފުށީ ދާއިރާ، މަހިބަދޫ ދާއިރާ، ފުވައްމުލަކު އުތުރު ދާއިރާ، ގަލޮޅު އުތުރު ދާއިރާ އަދި މާފަންނު އުތުރު ދާއިރާއެވެ.

މަޖިލިސް އިންތިހާބުގައި އެމްޑީޕީން 86 ދާއިރާ އަށް ވާދަކުރަން ވަނީ ނިންމާފައެވެ.