ވެރިކަން ބަދަލުވި ފަހުން 33،000 އަށްވުރެ ގިނަ މީހުން އެމްޑީޕީއާ ގުޅިއްޖެ

ސެޕްޓެމްބަރު 23 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބު އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހް ކާމިޔާބުކުރުމަށް ފަހު އެޕާޓީއާ ގުޅުނު މެމްބަރުންގެ އަދަދު 33،000 އަށް ވުރެ މައްޗަށް އަރާފައިވާ ކަމަށް ޕާޓީން ހާމަކޮށްފިއެވެ.

މަޖިލިސް އިންތިޚާބުގައި އެމްޑީޕީން ހުރިހާ ދާއިރާއަކަށް ވާދަކުރަން ނިންމުމާއެކު ޕްރައިމަރީތަކުގައި ބައިވެރިވުމަށް ގިނަ އަދަދެއްގެ ކެންޑިޑޭޓުން އަންނަނީ ފޯމު ހުށައަޅަމުންނެވެ. އެ ކެންޑިޑޭޓުން ވަނީ ޕާޓީއަށް އަލަށް ގުޅޭ ފަރާތްތަކުގެ ފޯމުތައް ހުށައަޅައި ޕްރައިމަރީގައި ވޯޓު ލެވޭ ގޮތް ހެދުމަށް މަސައްކަތް ކުރަމުންނެވެ.

އެމްޑީޕީގެ ދަފުތަރުގައި ރެޖިސްޓާ ވެފައިވާ ކަމަށް އިލެކްޝަންސް ކޮމިޝަނުން ހާމަކޮށްފައިވަނީ 29،008 މީހުންނެވެ. ނަމަވެސް ޕާޓީގައި 50،000 އަށްވުރެ ގިނަ މެމްބަރުން ރަޖިސްޓާ ވެފައި ތިބޭނެ ކަމަށް އެމްޑީޕީން ބުނެއެވެ. އަދި މިހާރު ހުށައަޅަމުންދާ ފޯމުތައް ބަލައި އެ މެމްބަރުން ދަފްތަރުގައި ހިމެނުމުން ޕާޓީގެ މެމްބަރުންގެ އަދަދު 80،000 އަށް އަރާނެ ކަމަށް އެމްޑީޕީން ލަފާ ކުރެއެވެ.

ރަސްމީ ގޮތުން އެންމެ ގިނަ މެމްބަރުން ތިބި ޕާޓީއަކީ މަޖިލީހުގެ މެޖޯރިޓީ ވެސް ނެގި ޕީޕީއެމްއެވެ. ޕީޕީއެމްގައި 48،129 މެމްބަރުން ތިބެއެވެ. އެމްޑީޕީ ދެވަނައިގައި އޮތް އިރު އެމްޑީއޭ ގައި 10،648 މެމްބަރުން ތިބެއެވެ. ޖޭޕީ ގައި ތިބެނީ 10،090 މެމްބަރުންނެވެ. އަދި އަދާލަތު ޕާޓީގައި 6،795 މެމްބަރުން ތިބެއެވެ.