ވެރިކަން ކުރަމުން އަންނަ ގުޅިފައިވާ ކޯލިޝަނުގެ ޕާޓީތަކުގެ މެދުގައި ވެފައިވާ އެއްބަސްވުން ލީކު ކޮށްލައިފިއެވެ.

މި އެއްބަސްވުން އާއްމުކޮށްފައިވަނީ އޮންލައިން ނޫސް “ދިވެހިޕޯސްޓްގެ ޖާނަލިސްޓެކެވެ” އިންނެވެ.

ދިވެހިޕޯސްޓްގެ ޖާނަލިސްޓް  ހާމަކޮށްފައިވާ ގޮތުގައި ލީކުވެފައިވާ އެއްބަސްވުމަށް އެއްބަސްވެފައިވަނީ މި އަހަރުގެ ޖުލައި މަހުގެ ތެރޭގައު ބޭއްވި ބައްދަލުވުމެއްގައެވެ. މި ބައްދަލުވުމުގެ ތެރޭގައި ޕާޓީތަކުންވަނީ ކޯލިޝަންގެ ފަރާތުން ނެރޭނެ ރިޔާސީ ކެންޑިޑޭޓް، ރަނިން މޭޓް، ރައްޔިތުންގެ މަޖިލީހުގެ ރައީސާއި ނައިބު ރައީސް އަދި ސަރުކާރު ބަހާނެ ގޮތްގޮތަށް އެއްބަސްވެފައެވެ.

އެއްބަސްވުމުގައި ވަނީ ކޯލިޝަންގައި ޕާޓީތަކުން ހިއްސާވާ މިންވަރުވެސް ކަނޑައަޅާފައެވެ. އެގޮތުން، އެމްޑީޕީ އިން 40 އިންސައްތަ ހިއްސާވާއިރު ޖުމްހޫރީ ޕާޓީން ހިއްސާވަނީ 25 އިންސައްތައެވެ. އަދާލަތު ޕާޓީން 15 އިންސައްތަ ހިއްސާވާއިރު މައުމޫން އަބްދުލް ގައްޔޫމް ހިއްސާވަނީ 20 އިންސައްތައެވެ.

މީގެއިތުރުންވެސް، ޑީޕީގެ ޖާނަލިސްޓް ހާމަކޮށްފައިވާ ގޮތުން ސަރުކާރުގެ އެކި އިދާރާތަކަށާއި ކުންފުނިތަކަށް މީހުން އައްޔަން ކުރުމުގަޔާއި އަންނަ އަހަރުގެ މަޖިލިސް އިންތިޚާބާއި 2020 ގައި އޮންނަ ލޯކަލް ކައުންސިލް އިންތިހާބުގައިވެސް ޕާޓީތަކުން ކޯލިޝަންގައި ތިބިނަމަ ހިއްސާވާނީ މި އިންސައްތައަށެވެ.

ހުރިހާ ޕާޓީތަކުން ސޮއިކޮށްފައިވާ މި އެއްބަސްވުމުގައި މަޖިލިސް ރައީސްކަމުގައި ހުންނަންވާނީ ޖުމްހޫރީ ޕާޓީގެ މެންބަރެއްކަމަށްވެސް ވަނީ ބުނެފައެވެ.