މަންދު ކޮލެޖްގެ ބިއްލޫރިގަނޑު ތަޅާލައިފި

ރައްޔިތުންގެ މަޖިލީހުގެ ކުރީގެ މެމްބަރު އިބްރާހިމް އިސްމާއިލް (އިބްރާ) މަޖީދީމަގުގައި ހިންގަވާ މަންދު ކޮލެޖުގެ މައި ދޮރުގެ ބިއްލޫރިގަނޑެއް ރޭ ތަޅާލައިފި އެވެ. މަންދު ކޮލެޖުގެ ބިއްލޫރިގަނޑެއް ތަޅާލައިފައި މި ވަނީ އޭނާ އިސްލާމް ދީނަށް ފުރައްސާރަކޮށް ވާހަކަ ދައްކާ ކަމަށް ބުނެ، މައްސަލަގަނޑެއް އުފެދިފައިވާ ދަނޑިވަޅެއްގަ އެވެ.

އިއްޔެ އާއި ރޭ ވަނީ އެ ކޮލެޖް ކުރިމަތީ އިބްރާ ހައްޔަރު ކުރަން ގޮވާލައި މުޒާހަރާ ވެސް ކޮށްފަ އެވެ.

ރަސޫލާ އާއި އެކަލޭގެފާނުގެ އަނބިކަނބަލުންނަށް ފުރައްސާރަކޮށް ޓްވިޓާގައި ލިޔެފައިވާ ކަމަށް ބުނާ މައްސަލައިގައި އިބްރާ ފުލުހުންގެ އިދާރާ އަށް އިއްޔެ ހާޒިރުކޮށް ސުވާލު ކޮށްފައި ވެސް ވެ އެވެ.