ދިވެހި ޕޯސްޓް (ޑީޕީ) ގެ ސޯޝަލް މީޑިއާ ގުރޫޕަށް ޖޮއިން ވުމަށް ކުލިކު ކޮއްލައްވާ
ޒިނޭއަށް ހިތްވަރު ދިނުމަކީ އެއްގޮތަކަށްވެސް ބާރު އަޅާ ކަމެއް ނޫންކަމަށާއި އެކަމާ ގުޅިގެން ދެއްކި ވާހަކަ އޮޅިވަޑައިގެންފައިވާނަމަ މަޢާފަށް އެދިވަޑައިގަންނަވާކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ. ނަޝީދު މިހެން މިއަދު ވިދާޅުވީ ދާދިފަހުން އޭނާ ދެއްކެވި ވާހަކަފުޅަކާ ގުޅިގެން އެތައް ބައެއްގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ.
މިއަދު މެންދުރުފަހު އޭނާ ކުރެއްވި ޓްވީޓެއްގައި ވިދާޅުވީ ކައިވެނިން ބޭރުން ދަރިން ލިބި، އެކުދިންނަށް ލިބޭ ނިކަމެތިކަމާއި ބާރުގަދަ މަސްތުވާތަކެތި ބޭނުން ކުރުމާ ގުޅިގެން އޭނާ ދެއްކެވި ވާހަކަފުޅު އެތައް ބަޔަކަށް އޮޅިވަޑައިގެންފައިވާކަމުގައެވެ.
ދާދިފަހުން ބޭއްވި އެމްޑީޕީގެ ކެމްޕޭން އެއްވުމެއްގައި ނަޝީދު ވިދާޅުވީ ކައިވެނި ނުކޮށް ދަރިން ހޯދާ މައްސަލައަށް އޮތް ހައްލަކީ ކުއްޖާގެ މަންމަ އަށް ބާތު ކޮންޓްރޯލް ކުރެވޭ ގޮތް ހެދުން ކަމަށެވެ. ނަމަވެސް މިހާރު އޮންނަ ގޮތުން ކައިވެނިނުކޮށް ތިބޭ އަންހެނުންނަށް ބާތު ކޮންޓްރޯލް ނުކުރެވޭ ކަމަށާއި އެއީ އެކަން އޮންނަންވީ ގޮތް ނޫން ކަމަށެވެ.
މިކަމާ ގުޅިގެން ގިނަ އަދަދެއްގެ ދީނީ އިލްމުވެރިންނާއި އާއްމުންގެ ފާޑު ކިޔުން އޭނާއަށް އަމާޒުވިއެވެ. އެގޮތުން، މިއީ ނުސީދާ ކޮށް ޒިނޭއަށް ހިތްވަރު ދިނުންކަމަށާއި، މިއީ ލާދީނީ ވާހަކައެއްކަމަށް އެތައް ފަރާތްތަކުން ދަނީ އަދިވެސް ބުނަމުންނެވެ.
ނަޝީދު ވަނީ މީގެކުރިންވެސް، މިފަދަ ލާދީނީ އެކި ވާހަކަތައް ދައްކަވާފައެވެ.
Facebook Comments